- बाढीबाट ९० हजारभन्दा बढी मानिस प्रभावित भएको अनुमान
- भोटेकोशी-त्रिशूली बाढीका कारण मृत्यु भएका ५४७ जनाको जनाभन्दा बढीको शव विभिन्न स्थानमा फेला परेको प्रहरीद्वारा पुष्टि
- बाढीप्रभावित स्थानहरूमा खोज र उद्धारकार्य जारी
- विभिन्न जलविद्युत् आयोजनाका सुरुङमा फसेका मानिसहरूलाई बाहिर निकाल्ने प्रयास हुँदै
- राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अहिलेसम्म विदेशी नागरिकसहित झन्डै १,००० जना अझै सम्पर्कविहीन
- चीनका प्रधानमन्त्रीद्वारा तिब्बततर्फ प्रभावित क्षेत्रको निरीक्षण
चीनका प्रधानमन्त्री ली चीआङ र अन्य अधिकारीहरूले तिब्बतमा बुधवारको बाढीबाट प्रभावित क्षेत्रको भ्रमण गरेका छन्। उक्त स्थान नेपालको सीमानजिकै पर्ने केरुङ काउन्टीमा पर्छ।
चिनियाँ समाचारसंस्था सिन्ह्वाका अनुसार राष्ट्रपति सी जिन्पिङले लीलाई त्यहाँ जारी उद्धार र आपत्कालीन प्रतिकार्यको नेतृत्व गर्न पठाएका हुन्।
बुधवारको विनाशकारी बाढीका कारण नेपालमा धनजनको ठूलो क्षति भएको छ। नेपालतर्फ ५५० जनाभन्दा बढी मानिसको मृत्यु भएको पुष्टि भइसकेको छ भने झन्डै १,००० जना अझै सम्पर्कविहीन छन्।
चिनियाँ सरकारी सञ्चारमाध्यमका अनुसार तिब्बततर्फ कम्तीमा पाँच जनाको मृत्यु भएको छ भने विदेशी पर्यटकहरूसहित ५०० जनाभन्दा बढी हराइरहेका छन्।बुधवारको बाढीका कारण ज्यान गुमाएकाहरूमध्ये शुक्रबार दिउँसो १५:०० बजेसम्म ५४७ जनाको शव फेला परेको प्रहरीले बताएको छ।
