१८ भदौ, धादिङ । पहिरोले अवरुद्ध मुग्लिन–काठमाडौं सडक सञ्चालनका लागि कृष्णभिरमा नयाँ ट्र्याक खन्ने काम सुरु भएको छ । पहिरो गएको स्थानभन्दा माथि नयाँ ट्र्याक खोल्ने काम सुरु भएको मलेखु–मुग्लिन सडक योजनाले जनाएको छ ।
‘भित्तातिरबाट खनेर नयाँ बाटो निकाल्ने भन्ने छ,’ योजना प्रमुख सजना अधिकारीले भनिन्, ‘सोहीअनुसार आजबाट भेजिटेसन क्लिअर गर्दै त्यहाँ भएका रुख काट्ने काम सुरु गर्यौं ।’
पहिरो नियन्त्रणका लागि लगाइएको ग्याबिन वालसमेत आवश्यक ठाउँमा निकाल्ने काम भइरहेको उनले बताइन् ।
उनका अनुसार भोलि शुक्रबारबाट मेसिनले ट्«याक खन्ने काम गर्छ । ‘आज दिनभर रुख काट्ने काम भयो, भोलिबाट मेसिन लगाएर ट्«याक खोल्ने काम सुरु हुन्छ,’ उनले भनिन् । भदौ महिनाभित्रै सडक सञ्चालन गर्ने तयारीका साथ काम अघि बढाइएको योजना प्रमुख अधिकारीले बताइन् ।
‘जतिसक्दो छिटो काम सक्ने तयारीमा छौं, नयाँ बाटो खन्दा भित्तामा कत्तिको रक भेटिन्छ त्यसमा पनि भर पर्छ,’ उनले भनिन् ।
कृष्णभिरमा गएको पहिरोका कारण पाँच दिनदेखि मुग्लिन–काठमाडौं सडक पूर्ण रूपमा अवरुद्ध छ । गत आइतबार त्रिशूली नदीमा आएको बाढीका कृष्णभिरमा सडकमूनिबाट पहिरो गएर सडक अवरुद्ध बनेको थियो
